अमेरिका पुगेर कोइरालाले भने– भारतको नाकाबन्दी गलत
कार्तिक २२, २०७२- नेपाली कांग्रेसका सभापति एवं पूर्व प्रधानमन्त्री सुशील कोइरालाले भारतको अघोषित नाकाबन्दी गलत रहेको टिप्पणी गरेका छन् । स्वास्थ्य उपचारको क्रममा शनिबार अपरान्ह यहाँ आइपुगेका कोइरालाले जोन अफ केनेडी अन्तर्राष्ट्रिय विमानस्थलमा संक्षिप्त कुरा गर्दै भारतको कदम गलत रहेको प्रतिक्रिया दिए । विवेक प्रयोग गर्दै कुटनीतिक निकायबाट नै दुई देशबीच देखिएको समस्या समाधान गर्नुपर्ने तर्क कोइरालाको थियो ।
एक अर्काे जिज्ञासामा उनले पार्टीको निर्णयअनुसार आफू प्रधानमन्त्री उम्मेदवार बनेको दाबीसमेत गरे । ‘म कसैको ईशारामा उम्मेदवार बनेको होइन,’ उनले भने ।
कांग्रेस कार्यकर्ताहरु सहित राष्ट्रसंघीय नेपाली नियोगका कर्मचारीहरुले विमानस्थलमा कोइरालाको स्वागत गरेका थिए । करिब तीन साता न्युयोर्कमा रहने कोइरालाको सोमबार मेमोरियल स्लोन केटरिङ क्यान्सर सेन्टरमा प्रारम्भिक उपचार हुने कार्यक्रम छ । अमेरिका बसाईको क्रममा कोइरालाले राष्ट्रसंघका महासचिव वान कि मुन तथा अमेरिकी विदेश मन्त्रालयका अधिकारीहरुलाई भेट्ने कार्यक्रम छ । यसका लागि राष्ट्रसंघीय नेपाली नियोग र वासिङटन डिसीस्थित नेपाली दुतावासले पहल गरिरहेका छन् ।
त्यसैगरि कोइरालाको सम्मानमा नेपाली डायस्पोरा सँग न्युयोर्कमा एक बृहत कार्यक्रमको आयोजना गरिने जनसम्पर्क समितीका महासचिव मुनेन्द्र नेम्वाङले कान्तिपुर लाई बताए ।
kantipur.ekantipur.com
0 comments
Write Down Your Responses