Featured, News » भुकम्पको धक्का कम हुन थाल्यो, जनजीवन सामान्य बन्दै

काठमाडौं, जेठ ६– गत बैशाख १२ गते आएको शक्तिशाली भुकम्प र त्यसपछि निरन्तर ठूला तथा साना पराकम्पनहरु आइरहँदा सर्वसाधारणहरु त्रसित भइरहेको सन्दर्भमा तीनदिनयता पराकम्पन हुने क्रम ह्वात्तै घटेको छ ।
विभिन्न गतल हल्ला र पराकम्पन आउने क्रम पनि नरोकिएपछि त्रसित भएका सर्वसाधारण अहिले भने बिस्तारै सामान्य अवस्थामा फर्किन सुरु गरेका छन् । गत बैशाख २९ गतेको शक्तिशाली पराकम्पनपछि घर भएर पनि खुल्ला स्थानमा पाल टाँगेर बसेका सर्वसाधारण धक्का कम भएसँगै आ–आफ्नो घर फर्कन थालेका हुन् । राष्ट्रिय भुकम्प मापन केन्द्रका अनुसार मंगलबार ४ रेक्टरमाथिमा ३ ओटामात्रै पराकम्पन भए भने सोमबारपनि तीन ओटा मात्रै पराकम्पन भए । यसैगरी आइतबार पनि तीन ओटामात्रै धक्का महशुस हुँदा शनिबार भने ९ ओटा पराकम्पन भएका थिए । यसैबीच गएराती कुनै पनि भुकम्पको धक्का महसुश भएन । काठमाडौं केन्द्रबिन्दु भएर राती धक्का महसुश भएपनि त्यो चार रेक्टरस्केल भन्दा कम भएको केन्द्रले जनाएको छ । विज्ञहरुका अनुसार ससाना पराकम्पनबाट आत्तिनु नपर्ने भएपनि सर्तक भने रहनुपर्नेछ । ठूला भुकम्पपछि महिनौंसम्म पनि ससाना धक्काहरु जानसक्ने उनीहरुको भनाई छ । झण्डै साँढे आठ हजारको ज्यान लिने गरी गएको १२ गतेको भुकम्पपछि ४ रेक्टर स्केल माथिका २ सय ४८ वटा पराकम्प गइसकेको छ ।

0 comments

Write Down Your Responses