मोदीको नेपाल नीतिप्रति भारतमा तीव्र विरोध
नयाँदिल्ली: भारतका विपक्षी दलहरूले नरेन्द्र मोदी नेतृत्वको सरकारको नेपाल नीतिप्रति तीव्र आक्रोश पोखेका छन्।भारतीय कांग्रेस आईका प्रवक्ता मनीष तिवारीले अन्नपूर्णसँग कुरा गर्दै मोदी सरकारले नेपालको आन्तरिक मामिलामा तीव्र हस्तक्षेप गरेकै कारण नेपालसँग अब चीनको साथ खोज्नुको विकल्प नदेखिएको टिप्पणी गरे।
‘नेपालले संविधान जारी गर्ने अन्तिम तयारी गरिरहेका बखत प्रतिनिधि पठाएर भारत सरकारले मुडेबल देखाएर हस्तक्षेप गर्नु बाञ्छनीय थिएन। पक्कै पनि भारतका आफ्नै रणनीतिक स्वार्थहरू छन्। तर संविधान जारी गर्दा भएको भारतको हस्तक्षेपबाट भारत नेपालमा अलोकप्रिय बनेको छ,' उनले भने।
प्रवक्ता तिवारीले भारतले नेपालप्रतिको आफ्नो पोजिसन पुनर्विचार गर्नुपर्ने पनि सुझाव दिए। उनले भारतको हस्तक्षेप बढेपछि नेपालले चीनको साथ र सहयोग खोज्नु बाध्यतात्मक रूपमा निर्विकल्प भएको बताए।'हामीले नेपालसँगको सम्बन्ध ह्यान्डल गर्न नसक्दा ऊ चीनतिर धकेलिनु भारतका लागि अत्यन्तै दुर्भाग्यपूर्ण छ,' उनले भने।
तिवारीले भारतीय जनता पार्टीले राष्ट्रिय स्वयंसेवक संघलाई खुसी पार्नकै लागि नेपालमा हिन्दु राष्ट्रको एजेन्डा प्रवद्र्धन गरिरहेको बताए। 'बीजेपी अहिले संविधानबाट अलग पारिएका (मधेसी) हरूको मुद्दामा होइन कि धर्म निरपेक्ष बनाइएकोमा होइन कि धर्मनिरपेक्ष बनाइएकोमा नेपालसँग बढी रुष्ट भएको हो,' उनले भने।
प्रवक्ता तिवारीले नेपाललाई संविधानमार्फत हिन्दु राष्ट्र घोषणा गर्नका लागि दबाब दिन भारतीय प्रधानमन्त्री मोदीले विदेशसचिव एस जयशंकरलाई संविधान जारी हुने अन्तिम समयमा नेपाल पठाएको बताए।उनले भारतले नेपालमा प्रभाव राख्न सक्नुपर्ने बताउँदै बीजेपीलाई मुडेबलका आधारमा त्यसो नगर्न सुझाए।
नेपालले अहिलेको आफ्नो मुद्दा आफैं समाधान खोज्नुपर्ने र भारतले त्यसमा सहयोगी संवादकर्ताको भूमिकामा सघाउनुपर्ने बताए। 'चीनतिर हुनेगरी बीजेपीले जबजरस्ती नेपाललाई धकेल्नु उचित भएन,' उनले भने।
भारतीय नेसनलिस्ट कंग्रेसका महासचिव डीपी त्रिपाठीले भारतीय नागरिक मधेस आन्दोलनमा मारिनु दुर्भाग्यपूर्ण रहेको बताए। उनले मधेस आन्दोलन नेपाल आफैंले समाधान गर्नुपर्ने पनि बताए।
उता भारतीय कम्युनिस्ट पार्टी माक्र्सवादीका नेता योगेन्द्र शर्माले भारतको विदेश नीति नेपाल मामिलामा फेल भएको बताए। उनले पाकिस्तान र नेपाललगायत सबैतिर मोदीको विदेश नीति फेल भएको बताए।
नेपालको संविधान स्वागत नगरेर भारतले गल्ती गरेको उनको भनाइ थियो। 'भारतको अहिलेको नेपाल नीति भारत आफैंलाई घातक छ,' उनले भने।
annapurnapost.com
0 comments
Write Down Your Responses